Pas eliminimit nga Liga e Kampioneve, kundërofensiva e PSG-së nuk ndalet vetëm me rinovimin e Kilian Mbapesë.
Presidenti Nasser Al-Khelaifi dëshiron edhe një trajner të madh e për këtë arsye të hënën në Paris takoi Zinedin Zidanin për t’i ofruar pankinën e klubit parisien. Për ish-teknikun e Realit u vu në tavolinë një ofertë faraonike prej 25 milionë Eurosh në një sezon, që do ta kthejë atë në trajnerin më të paguar në botë.
Nëse pranon, francezi do të marrë më shumë se Diego Simeone që paguhet 24 mln Euro te Atletiko Madridi dhe Pep Guardiola, që përfiton 23 mln Euro te City.
Por Zidan nuk i ka kthyer një përgjigje PSG-së. Sipas spanjolles “ Mundo Deportivo”, ai synon që të ulet në stolin e përfaqësueses së Francës.
Detyra e trajnerit të “gjelave” do t’i lejonte të vazhdonte të jetonte në Madrid, e do të zhvendosej në Paris vetëm për aktivitetet e kombëtares.