Ish ministri i Brendshëm Saimir Tahiri ka mbërritur në Gjykatën e Krimeve të Rënda në seancën e radhës ku do të shqyrtohen hetimet e prokurorisë. Ajo që ka rënë në sy në fakt është se dosjet hetimore janë kaq shumë, saqë është dashur që ato të sillen me karrocë.
Bëhet fjalë për 53 dosje që lidhen me çështjen, ku Tahiri akuzohet për trafik ndërkombëtar droge, akuzë që ai nuk e ka pranuar asnjëherë.
Herën e fundit në gjykatë, ku seanca dështoi pëasi nuk ishin njoftuar të hetuarit e tjerë, Jaeld Çela, Gjergj Kohila dhe Sokol Bode, të cilët janë në arrati, avokati i Tahirit la të hapur mundësinë për të kërkuar gjykim të shkurtuar.
“Nëse do vazhdojë kështu kalvari i zgjatjeve, do të detyrohemi ta bëjmë kërkesën me gjykim të shkurtuar. Gjithë materiali që ne kemi parë në 57 kapituj, në fashikujt e dosjeve në ngarkim të Tahirit dhe të tjerëve nuk ka asnjë provë që të implikojë Tahirin, që të çojë në ngritjen dhe bazueshmërinë e akuzave, për të cilat ai është sjellë për gjykim. Nuk ka letërporosi, ishte abuzim dhe keqdashje në çështjen ‘Tahiri’ nga analistë të qëllimshëm dhe të pozicionuar. Nuk ka 8, por 2 letërporosi që nuk kanë të bëjnë me akuzat”, tha atëherë avokati Maks Haxhia.
