Vizita e ministrit të Jashtëm grek, Nikos Dendias në Tiranë dhe qëndrimet për çështjen çame, i cili tha se nëse përmendet Çamëria s’ka integrim të Shqipërisë në Bashkimin Europian, po ashtu vijon të shkaktojë lajm.
Këtë të hënë në Kuvendin e Shqipërisë po mbahet “Java Çame” që përkujton gjenocidin mbi çamët, dhe kreu i PDIU-së, Shpëtim Idrizi tha se Dendias dhe Mitsotakis duhet të mos harrojnë deklaratën e babait të kryeministrit aktual Mitsotakis, i cili e ka pranuar çështjen çame në takime me ish-kryeministrin Aleksandër Meksi.
“Kush pjesë e çështjes çame nuk ekziston, nuk ekziston komuniteti çam? Ja ku i keni brenda në këtë sallë, nuk po përmend numrat. Nuk ekziston gjenocidi? Janë me mijëra të vrarë, familjarët tanë, prapë do t’i dëgjoni këtu nga rrëfenjat nga dëshmitarët okularë? Nuk ekziston çështja e të drejtave të njeriut? Të gjithë e dinë se akoma pleqtë shqiptarë të Çamërisë kur duan të shkojnë të shohin dhe njëherë shtëpitë e tyre, i ndalojnë në kufi. Të gjitha këto pjesë që përbëjnë çështjen e shqiptarëve të Çamërisë janë aty, janë në këmbë dhe unë nuk e di se kush pjesë nuk ekziston. Më duhet t’i kujtoj ministrit të Jashtëm të Greqisë së sotme, por dhe kryeministrit të sotëm, as më shumë e as më pak, por babain e kryeministrit të sotëm Mitsotakisin e parë, i cili në takimet me z. Meksi e ka pranuar ekzistencën e çështjes çame, madje kanë pranuar që të ngrenë dhe komisionet mikse duke filluar nga ngritja e varrezave për partizanët çamë të rënë në Greqi. Të paktën, të paktën të vdekurit t’i trajtojmë njësoj. Ne jemi të detyruar të vazhdojmë betejën tonë për drejtësi. Të gjithë ata që thonë heshtni, ne nuk heshtim dot për familjarët tanë, por bëjnë mirë të mos heshtin ata”.