Tre shtetas malazezë kanë mbetur të plagosur mëngjesin e sotëm nga një shpërthim në anijen me kontejnerë “MSC Rachele” në afërsi të portit të Toulon në Francë.
Sipas France3 , qendra operacionale rajonale për vëzhgimin dhe shpëtimin e Mesdheut është paralajmëruar mëngjesin e sotëm, rreth orës 9, se një anije ishte në vështirësi në brigjet franceze.
Ata deklarojnë se në motor ka ndodhur një shpërthim, i cili ka shkaktuar zjarr në anije, ku kanë mbetur të plagosur tre persona, dy prej tyre në gjendje të rëndë.
Të gjithë të plagosurit u transferuan në bregdet nga marina franceze.
Të plagosurit më rëndë u dërguan në spitalin ushtarak Sainte-Anne në Toulon, ndërsa marinari i plagosur lehtë u transferua në qendrën spitalore ndërkomunale.
Anija me kontejnerë “MSC Rachele”, e cila lundron nën flamurin panamez, është një anije mallrash e gjatë 334 metra me kapacitet mbajtës rreth 100 mijë tonë.