Një 60-vjeçar humbi jetën para 5 ditësh në Dibër.
Fillimisht ngjarja u referua si aksidentale dhe u tha se 60-vjeçari N.B, ishte rrëzuar teksa po zbriste nga makina e parkuar ku ishte pasagjer. Ai mori dëmtime të rënda në kokë dhe u dërgua në spitalin e Traumës në Tiranë, por nuk mundi të shpëtonte.
Policia pas hetimeve të thelluara ka zbardhur ngjarjen dhe ka ndaluar autorin e dyshuar të plagosjes me pasojë vdekjen e 60-vjeçarit. Gjithashtu janë proceduar penalisht 3 shtetas të tjerë për moskallëzim krimi.
“Në përfundim të veprimeve procedurale, u bë ndalimi i shtetasit:
O. T., 53 vjeç, banues në fshatin Shimçan, Dibër, për veprën penale “Plagosja e rëndë me dashje”, me pasojë vdekjen.
Gjithashtu, filloi procedimi penal në gjendje të lirë për shtetasit E. T., 48 vjeç, L. K., 52 vjeç dhe A.T., 63 vjeç, për veprën penale “Moskallëzimi i krimit”.
Shtetasi O. T. dhe 3 shtetasit e tjerë të proceduar në gjendje të lirë, në datën 26.06.2022, deklaruan se ngjarja ka ndodhur në mënyrë aksidentale, sepse shtetasi N. B., 60 vjeç, duke zbritur nga automjeti i parkuar i shtetasit E. T., ishte rrëzuar aksidentalisht dhe për pasojë ishte dëmtuar në kokë.
Më pas, në bazë të dyshimeve të krijuara për rrethanat e kësaj ngjarjeje, bazuar dhe në informacionet e siguruara në rrugë operative, në bashkëpunim me Prokurorinë pranë Gjykatës së Shkallës së Parë Dibër, u bë regjistrimi i procedimit penal për veprën penale “Plagosja e rëndë me dashje”, me pasojë vdekjen.
Në përfundim të veprimeve hetimore është bërë i mundur dokumentimi me prova ligjore i kësaj ngjarjeje. Nga veprimet hetimore ka rezultuar se më datë 26.06.2022, në lagjen “Kamen”, Peshkopi, pranë lokalit të shtetasit L. K., pas një konflikti për motive të dobëta, shtetasi O. T. ka shtyrë shtetasin N. B., i cili është rrëzuar në tokë, duke marrë dëmtime të rënda, si pasojë e të cilave humbi jetën në spital, mbrëmjen e datës 28.06.2022″, thuhet në njoftim.