Merita Hajdari, e cila prej vitesh mbledh kanaçe për të siguruar jetesën por së fundmi ka dalë biznesmene e pronare e kompanive që janë akuzuar për evasion fiskal, tregon se si i është përdorur emri. E ftuar në TPZ, Hajdari tha se ajo nuk ka parë kurrë milionë lekë me sy, por që çdo ditë dëgjon emrin e saj në televizione që përmendet si sipërmarrëse. Ajo tregon se jo më larg se sot, ka marrë vesh se ka edhe një biznes në Fushë Kuqe, me kapital prej 1 milionë lekësh të reja. E pyetur nëse e ka karcënuar njeri apo jo pas kësaj skeme, Hajdari thotë se është e qetë nga kjo pjesë, por që kërkon drejtësi për emrin e saj.
“Unë çdo ditë ngela duke dalë në media, çdo ditë dal biznesmene, ku i paskam bërë gjithë këto miliona leke unë, ku i kam parë ndonjëherë kaq lekë unë. Unë edhe sot mora vesh se paskam një biznes në Fushë Kuqe, ku di unë ku bie Fushë Kuqja. Nuk kam gjë more, qenkam bërë miliardere pa lekë në dorë, unë s’e di domethënë. S’më kanë thënë gjë jo, aspak, po të më kishin thënë gjë, s’do isha këtu unë sot,”- thotë Hajdari.
Merita Hajdari është edhe në Prokurorinë e Posaçme Kundër Korrupsionit dhe Krimit të Organizuar (SPAK) pasi emri i saj u lakua si një nga përftueset e miliona eurove nga afera e evazionit fiskal. Hajdari është vetëm një prej disa emrave që figurojnë përftues nga afera e evazionit fiskal. Aty kanë dalë edhe azilantë e të vdekur.