Mëngjesin e sotëm në zonën e Rrugës së Barrikadave u regjistrua një tentativë grabitje, ku u sulmua me levë nga dy grabitës punonjësi i një pike të këmbimit valutor. Ai kishte një çantë me para, të cilat do i depozitonte në bankë.
Një prej grabitësve u kap në kohë rekord nga policia. Në këtë zonë në orët kur ndodhi ngjarja ka mjaft qarkullim, dhe ndonjëherë sirenat e policisë për të hapur rrugën ndodh që nuk respektohen. Por duket se policia ka nisur të përdorë një teknikë të re për të shkuar sa më shpejt në vendngjarje kur ka ngjarje të tilla.
Altoparlantët e policisë i kishim dëgjuar deri tani vetëm në protestat e opozitës ku i kërkojnë protestuesve të ruajnë qetësinë dhe të mos sulmojnë efektivët. Por tashmë duket se do i dëgjojmë në aksionet policore.
Teksa sapo kishte marrë njoftimin nga salla operative për ngjarjen e ndodhur efektivët janë nisur drejt vendngjarjes, por trafiku i rënduar duket se mund tia ngadalësojë arritjen. Krahas sirenave të shumta policia ka përdorur dhe altoparlantin “Ju lutem hapni rrugën”.
Fatmirësisht ndërhyrja në kohë solli arrestimin e njërit prej grabitësve, teksa është në kërkim tjetri.
