I riu Xhuliano Këlliçi humbi jetën mbrëmjen e së shtunës në një aksident tragjik në Treviso të Italisë.
Ai humbi jetën së bashku me tre miqtë e tij pasi makina me të cilën po udhëtonin ka rrëshqitur duke dalë nga rruga.
19-vjeçari jetonte në Cordignano dhe ishte portier në një ekip futbolli italian.
Katër të rinjtë, të cilët udhëtonin me një Volkswagen ‘Polo’ po ktheheshin në shtëpi pas një mbrëmjeje me miqtë.
Makina dyshohet se rrëshqiti gjatë marrjes së një kthese në të majtë, më pas u përplas me një rrap dhe u përmbys në një kanal.
Rruga e aksidentit sipas medias Il Gazzetino është një rrugë rurale dhe një vendburim aksidentesh pasi në të ka precedentë të mëparshëm të përplasjeve me humbje jete.