Kreu i Partisë së Lirisë, Ilir Meta 1 muaj pasi la Presidencën ku qëndroi 5 vite, është në procedim penal nga Prokuroria Anti Korrupsion, pas një kallëzimi të bërë nga ish-deputeti Halit Valteri. SPAK i është drejtuar Komisionit Qendror të Zgjedhjeve për një kopje të vetëdeklarimit si dhe Drejtorisë së Gjendjes Civile përsa i takon mbiemrit të tij.
Kërkesës së prokurorisë, Meta iu përgjigj duke nxjerrë një tjetër shkresë që SPAK i ka drejtuar drejtorisë së gjendjes civile ku kërkon informacion mbi gjeneralitetet e tij. Për të SPAK-u ka vendosur t’i shërbejë hapur mafies së inceneratorëve në panik, duke e cilësuar edhe një herë reformën në drejtësi si Ramaforma.
Debati për mbiemrin u rihap pas deklaratës së Autoritetit të Dosjeve të Ish-Sigurimit të Shtetit. Në media u aludua gjerësisht se personi me inicialet I.M, që kishte bashkëpunuar me ish-Sigurimin ishte ish-presidenti Ilir Meta(j).
Do jetë një skandal i përmasave të mëdha, nëse gjeneralitetet e ish-presidentit janë në të vërtetë Ilir Metaj, ndërkohë që të gjitha dokumentet zyrtare përfshi edhe dekretet janë firmosur me emrin Ilir Meta. Një kërkesë i është dërguar edhe KQZ-së për t’i mundësuar SPAK-ut formularin e vetëdeklarimit të Metës, që edhe në këtë rast, nëse do të rezultonte i vetëdeklaruar me emrin Ilir Meta, dhe në gjendjen civile si Ilir Metaj, do të konsiderohej si deklarim i rremë.
Ilir Meta ka dorëzuar forumlarin e dekriminalizimit në vitin 2013, kohë edhe kur ka kandiduar për deputet.