Trupi i Mbretëreshës së ndjerë Elizabeta II, mbërriti mbrëmjen e të martës në Pallatin Buckingham, atje ku e prisnin duke shprehur respektin e tyre, mijëra njerëz në kryeqytetin Londër, edhe në mes të shiut që vazhdoi për orë të tëra.
Nga sot, arkëmorti i monarkes 96-vjeçare, do të vendoset në Westminster Hall, si pjesë e një procesioni të jashtëzakonshëm ushtarak, atje ku do të qëndrojë deri të hënën e ardhshme, kur do të mbahet edhe funerali shtetëror.
Për katër ditë me radhë, edhe publiku i thjeshtë, do të mund të bëjë homazhe pranë arkëmortit të Elizabetës, deri në ditën e funeralit, për të cilën ftesat tashmë janë ndarë e dhjetëra liderë botërorë e zyrtarë të lartë kanë konfirmuar pjesëmarrjen, mes të cilëve, edhe presidenti amerikan Joe Biden.