Policia britanike ka vënë në pranga një 33-vjeçare shqiptare, pasi dyshohet se ka ndihmuar në transportin e emigrantëve të paligjshëm në Britaninë e Madhe. Ajo u arrestua mëngjesin e sotëm në Banbury, Oxfordshire.
“Ne jemi të përkushtuar të nxjerrim para drejtësisë bandat kriminale që qëndrojnë pas këtyre udhëtimeve vdekjeprurëse nëpër kanal. NCA po kryen punë jetike me partnerët tanë ndërkombëtarë”, tha Sekretarja e Brendshme, Suella Braverman.
Një bandë shqiptare e përfshirë në kontrabandimin e migrantëve në Britaninë e Madhe nëpërmjet Spanjës u godit dy javë më parë pas një operacioni të përbashkët.
Shtatë të dyshuar u arrestuan pasi emigrantë kryesisht shqiptarë u zhvendosën nëpër qytetet veriore të Bilbaos dhe Santander në Mbretërinë e Bashkuar duke përdorur tragetet dhe rrugët e transportit të mallrave për në Portsmouth, Southampton dhe Liverpool.