Këtë të premte ishte radha e deputetit të PD-së, Gazment Bardhi që të paraqitet në SPAK. Pas qëndrimit prej gati 30 minutash në Prokurorinë e Posaçme, në një deklaratë për mediat, Bardhi tha se ishte thirrur në cilësinë e kallëzuesit në emër të PD për inceneratorin e Elbasanit, ku inkurajoi SPAK për të përfunduar hetimet.
“Sot isha në cilësinë si kallëzues për inceneratorin e Elbasanit që mesa duket është duke përparuar në hetimet, edhe pse pas dy viteve nuk kanë përfunduar ende. Kam konfirmuar kallëzimin e bërë në emër të PD. Inkurajoj SPAK-un për të përfunduar hetimet e për të çuar para drejtësisë në mënyrë të plotë të gjithë personat përgjegjës. Kam kërkuar që të merret në cilësinë e provës e materiale dhe gjetjet e komisioniet hetimor parlamentar, ka pasur shtesë kallëzim nga PD mbi bazën e punës së bërë në komisionin hetimor e kam kërkuar nga SPAK që materialet të jenë pjesë e dosjes hetimore. Personat e kallëzuar nisin nga kryeministri Edi Rama deri te nëpunësit e fundit që kanë firmosur dhënien me koncesion”.
I pyetur për inceneratorin e Tiranës, deputeti i PD-së tha se deri më tani nuk ka asnjë zhvillim për të, por nxiti SPAK-un që të çojë para hetimet.