Kryetari i bashkisë së Divjakës, Fredi Kokoneshi është sulmuar me thikë mëngjesin e kësaj të premteje nga Orges Xhelili. Ai është dërguar në Spitalin e Lushnjës dhe është jashtë rrezikut për jetën. Orges Xhelili, më herët ka punuar si punonjës IT pranë bashkisë së Divjakës.
Nusja e Xhelilit aktualisht punon si shefe e infermiereve tek poliklinika e Divjakës, aty ku ka ndodhur edhe ngjarja. Shkak për plagosjen është bërë lëvizja nga vendi i punës i gruas së autorit të ngjarjes. Atë e kanë lëvizur nga spitali i Divjakës, gjë që ka sjellë dhe revoltimin e Xhelilit. Ky i fundit ka shkuar dhe i ka kërkuar llogari Kokoneshit, pasi pretendonte se kjo lëvizje ishte bërë me urdhër të tij.
“Pse më lëvize gruan nga puna”,-mësohet të ketë thënë Xhelili. Sherri ka agravuar dhe i riu ka qëlluar me thikë kryebashkiakun, ai ka plagosur edhe shoferin e Kokoneshit, Gazmend Bullari që ka ndërhgyrë për t’i ndarë. Të plagosurit ndodhen në spital ndërsa Xhelili është vënë në pranga.
Nuk është rasti i parë i dhunimit të Kokoneshit. Më herët, ai është dhunuar nga një i ri në mes të qytetit. Ka qenë vetë Kokoneshi ai që ka denoncuar në polici për 32-vjeçarin Dritan Sterkaj.