Mungesa e Lionel Mesit në stërvitjen e Argjentinës dy ditë përpara nisjes së botërorit solli ankth të madh te tifozët, e jo vetëm te ata bardhekaltër. Reagimet ishin të shumta në rrjetet sociale, me fansat të frikësuar se mos shtatë herë fituesi i “Topit të Artë” kishte një dëmtim serioz.
Por federata argjentinase e futbollit reagoi menjëherë dhe sqaroi se sulmuesi 35-vjeçar nuk ka asnjë shqetësim serioz.
Në stërvitjen e përfaqësueses ishin të shumta mediat ndërkombëtare të pranishme në qendrën stërvitore, për të ndjekur një nga futbollistët më të mirë në historinë e futbollit.
Mungesa e tij solli me vetë dyshime. Por lojtari kishte punuar fillimisht në palestër me Rodrigo De Paul, Leandro Paredes, Angel Di María dhe Nicolas Otamendi, e iu bashkua grupit të madh të lojtarëve kur mediat ishin larguar.
Gjendja e yllit të futbollit ka sjellë shqetësime tek argjentinasit, pasi ai pësoi një lëndim në miqësoren ndaj Emirateve të Bashkuara Arabe në fillim të javës. Në fitoren 5-0, shënoi edhe Mesi.
Sfida e parë e Argjentinës në Katar 2022 do të jetë ndaj Arabisë Saudite më 22 nëntor. Trajneri i përfaqësueses shpreson që Mesi të jetë në gjendjen e tij më të mirë fizike dhe mendore, ndërsa bardhekaltrit shikohen si një ndër ekipet pretendente për ta fituar botërorin.