Çmimet e naftës u tregtuan pranë niveleve më të ulëta 2-mujore të hënën, pasi frika e ofertës u zvogëlua, ndërsa shqetësimet mbi kërkesën për karburant nga Kina dhe forcimi i dollarit amerikan ndikuan tek çmimet.
Kontratat e së ardhmes së naftës së papërpunuar Brent për janarin ranë me 74 cent, në 86.88 dollarë për fuçi, ndërsa kontratat e së ardhmes së naftës së papërpunuar të Teksasit Perëndimor për dhjetorin ishin 79,40 dollarë për fuçi.
Sipas analistëve të tregut, ndjenja e rrezikut bëhet e brishtë pasi të gjitha të dhënat e fundit ekonomike të vendeve të mëdha tregojnë për një skenar recesioni, veçanërisht në Mbretërinë e Bashkuar dhe zonën e euros. Ndërkohë, komentet e ashpra nga Rezerva Federale javën e kaluar ndezën gjithashtu shqetësime mbi ekonominë e SHBA.
Shifrat e rasteve me COVID-19 në Kinë mbetën afër nivelit maksimal të prillit. Shkollat në disa rrethina të kryeqytetit Pekin u mbyllën pasi zyrtarët u kërkuan banorëve të qëndronin në shtëpi, ndërsa qyteti jugor i Guangzhou urdhëroi një bllokim 5-ditor.
Furnizimet e tkurrura të naftës së papërpunuar në Europë janë lehtësuar pasi rafinerët kanë grumbulluar stoqe përpara embargos së 5 dhjetorit të Bashkimit Europian ndaj naftës së papërpunuar ruse, duke ushtruar presion mbi tregjet në të gjithë Europën, Afrikën dhe Shtetet e Bashkuara.