Një ngjarje e rëndë ka tronditur vendin mëngjesin e sotëm, ku dy bashkëshortë humbën jetën si pasojë e flakëve që përfshiu shtëpinë e tyre.
Rreth orës 03.45 në shtëpinë e Pal Gjonit kishte rënë zjarr, teksa familjarët ishin të gjithë në gjumë. Katër fëmijët e çiftit, të moshave 15,13,12 e 11 vjeç mundën të hidheshin nga dritaret e katit të dytë të banesës, duke i shpëtuar flakëve.
Ata ndihmuan të dalë nga banesa gjyshen e tyre të paralizuar, ndërsa ka qenë gjyshi 82-vjeçar që ka ka parë zjarrin dhe ka dhënë alarmin.
Pertrit dhe Dava Ndoji, përkaësisht 46 dhe 35 vjeç, u gjetën të pajetë pranë njëri-tjetrit, në përpjekje për të dalë nga dhoma e gjumit në katin e dytë të shtëpisë.
Fëmijët dhe gjyshërit ndodhen në spitalin e Pukës me dëmtime të lehta bën të ditur policia. I moshuari Pal Ndue Gjoni rrëfen se kishte dëgjuar tjegullat të kërcisnin, e më pas i doli gjumi. “U qetësova kur pashë fëmijët në oborr”, thotë Pali kur në momentin e parë nuk e dinte se çifti humbi jetën. “Kjo që më ndodhi mua, mos i ndodhtë askujt”, thotë për News 24 me lot në sy i moshuari, i cili ka probleme kardiake.
NJOFTIMI I POLICISE
Pukë/Informacion Paraprak
Me datë 08.04.2019, rreth orës 03.45 në Pukë, në banesën e shtetasit P. N ka rënë zjarr.
Si pasojë e zjarrit kanë humbur jetën shtetasit P. N. 46 vjeç dhe bashkëshortja D. N. 35 vjeçe, ndërsa 4 fëmijët e tyre të moshës 15 , 13 , 12 e 11 vjeç ndodhen në Spitalin e Pukës me dëmtime të lehta.
Nga informacionet paraprake dyshohet se zjarri ka rënë për shkak të një shkëndije elektrike.
Grupi hetimor po vijon veprimet në vendngjarje për sqarimin e rrethanave si dhe për përcaktimin e shkakut të zjarrit