Një 35-vjeçar nga Elbasani, i cili ishte shpallur në kërkim ndërkombëtar, është vënë në prangat e policisë holandeze, në kuadër të një operacioni të zhvilluar në bashkëpunim me Policinë e Shtetit.
Konkretisht është arrestuar Eljo (Ervis) Bitri, i njohur ndryshe si Bledar Debrova, 35 vjeç, lindur dhe banues në Elbasan.
Ai u kap në Leiden të Holandës, duke qarkulluar me armë zjarri pistoletë me silenciator dhe me dokument me identitet tjetër.
Pas veprimeve verifikuese nëpërmjet Interpol Tirana dhe Interpol Hagë, Holandë, pas krahasimit të gjurmëve të gishtave, u bë arrestimi provizor i tij, me qëllim ekstradimi.
Gjithashtu 35-vjeçari ishte shpallur në kërkim ndërkombëtar edhe nga Belgjika, pasi Gjykata e Shkallës së Parë në Bruksel, Belgjikë, më datë 31.05.2022, ka lëshuar ndaj këtij shtetasi urdhër arrestin për kryerjen e veprës penale “Vrasja me paramendim”, parashikuar nga Kodi Penal i Belgjikës (maksimumi i dënimit burgim i përjetshëm).