Tre helikopterë të tipit “Black Hawk” do të merren nga Shtetet e Bashkuara të Amerikës, dhe lajmi u bë i ditur nga vetë ministrja e Mbrojtjes, Olta Xhaçka.
E ftuar në Real Story, të Sokol Ballës, Xhaçka tha se në javët në vijim do të jetë në SHBA për të firmosur kontratën.
“Do të marrim (Shqipëria) tre helikopterë të tipit “Black Hawk”. Kontrata firmoset pas pak javësh në SHBA. Do rrisë kapacitet tona, do e modernizojnë flotën tonë. Janë në gjendje shumë të mirë dhe normalisht të përdorura”, vijoi ministrja e Mbrojtjes
Duke folur për bashkëpunimin me NATO-n, Xhaçka tha se 10-vjetori i anëtarësimit të Shqipërisë në NATO është dhe një moment krenarie dhe reflektimi.
“Unë besoj që është edhe një moment krenarie, sepse besoj që kemi bërë shumëçka në këto 10 vite edhe unë e theksova edhe gjatë aktiviteteve, nuk donim ta trajtonim thjesht si një ditëlindje të anëtarësimit të Shqipërisë në NATO”, – tha Xhaçka.
Sipas saj, vendi ynë ka marrë përgjegjësitë që takon në këtë aleancë.
