Gjatë një ceremonie është vlerësuar kontributi i futbollistit të njohur Dali Farruku duke i dhënë fushës sportive emrin e tij.
Kryetari i Bashkisë Agron Malaj tha gjatë fjalës së tij se Dali Farruku është legjendë e futbollit matjan. “Ai, shtoi Malaj, ka ngritur peshë zemrat e tifozëve të Burrelit dhe ka treguar klasin e lartë sportiv, duke spikatur si një nga lojtarët më të mirë të vendit”.
Mjeshtri Farruku falenderoi Këshillin e Bashkisë Mat, tifozët e Burrelit, ish trajnerët, lojtarët ndër vite dhe skuadrën aktuale për vlerësimin që i bëhet.
Dali Farruku është një gjeni në lojën e bukur të futbollit. Më shumë se fjalët e tij vlejnë faktet, pohimet e ish kolegëve, tifozëve, njerëzve të këtij sporti. Farruku është modest kur shprehet se “askush nuk mund të flasë për veten e tij, janë tifozët, kolegët, specialistët ata që vlerësojnë lojën, kontributin për cdo futbollist”.
Karriera e talentit të Burrelit nis në vitet ’70, kohë kur ai luante me klasat sportive dhe më pastaj me skuadrën “31 korriku”. Spikat loja e tij e bukur, mjeshtëria në përdorimin e topit, aksionet e veçanta dhe në moshën 17 vjeç vesh bluzën e ekipit të të rriturve.
“E mbaj mend mjaft mirë ndeshjen e parë të karrierës time, thotë Dali Farruku. Kemi udhëtuar drejt Himarës dhe unë isha pjesë e formacionit bazë. Emocionet ishin të shumta sepse isha futbollisti më i ri në atë kampionat për Kategorinë e Dytë”. Duke iu referuar kontributit të dhënë ai shton se ka luajtur me gjithë shpirt dhe dinjitet, duke përfaqësuar skuadrën me të cilën ka luajtur.
“U jam borxhi përjetë tifozëve matjanë e lushnjarë, sepse vazhdimisht më kanë mbështetur, më kanë dhënë kurajo, forcë dhe respekt”-shton ylli i futbollit matjan.
“Stadiumi mbushej plot. Mijëra njerëz, me kulturë e qytetari ndiqnin ndeshjet e futbollit. Askush nuk fyente e godiste gjyqtarët, trajnerët, futbollistët apo tifozët. Nuk bëhej fjalë për shkelje të rregullave të futbollit siç dëgjojmë e shohim rëndom tani”-thotë Farruku i Matit.
Farruku shton se asokohe bëhej një punë mjaft e madhe me grup moshat. Ekipet e të rinjëve ishin baza kryesore e furnizimin të ekipit të të rriturve. “Unë, thotë talenti brilant, vazhdoj t’i qëndroj idesë se baza e ekipit të të rriturve duhet të jenë futbollistët e ekipeve të të rinjëve. Po ashtu vazhdoj të mendoj se shumica e futbollistëve të skuadrës së Burrelit duhet të jenë “autoktonë”. Mund të pranohet se 3-4 futbollistë të merren nga ekipe të tjera, por kurrësesi jo shumica e tyre”.
Teksa kujton vitet e arta të karrierës së tij Farruku shpreh nostalgji për ish trajnerët Bert Jashari, Qirjako Kola, Lekë Sulku, Zyber Xhetani, Baftjar Punavija, etj. Ndërkohë përmend faktin tjetër së futbollistë të Burrelit kanë lozur me ekipe të tjera, duke veçuar Sajmir Xhetanin, Xhelal Farrukun, Vladimir Gjonin, Kastriot Ramën, Besnik Beqirin, etj.
Nga viti 1974 deri në vitin 1987 Farruku ka lujtuar për ngjyrat e Burrelit, madje siç thonë specialistët e futbollit në këtë qytet ai ka spikatur më shumë se kurdoherë në vitet ’80-90, sidomos në kampionatet 1981, 1983, 1986 kur Burreli debutonte në Kategorinë e Parë, përballë Dinamos, Tiranës, Partizanit, Vllaznisë, etj.
Tifozët kujtojnë me nostalgji lojën tribluese dhe golat e vecantë të Dali Farrukut, duke mahnitur emra të njohur të futbollit të asaj kohe. Ndërkaq në vitet 1987-1994 Dali Farruku vesh bluzën e ekipit të Lushnjes.
“Nuk ishte e lehtë në ato vite të lëvizje nga vendlindja dhe të gjeje vend në ekipet e tjera. Por unë kam mbetur mjaft i vlerësuar nga sportdashësit dhe drejtuesit e ekipit të Lushnjes. Ruaj kujtimet më të mira. Nuk do t’i harroj sa të jem gjallë. Më kanë dashur dhe i kam dashur me gjithë shpirt”-kujton legjenda e futbollit shqiptar në vitet ’80-të.
Me modesti ai tregon se në dy sezone futbollistike është shpallur golshënuesi më i mirë, një herë në Kategorinë e Parë me 13 gola dhe një herë tjetër më 18 gola në Kategorinë e Dytë.
“Kam zhvilluar afro 480 ndeshje në 23 vjet të karrierës time dhe kam shënuar të paktën 230 gola.
Në vitet 1981, 1983, 1986 dhe 1994 ekipi ynë është ngjitur në Kategorinë e Parë, edicione këto ku unë kam luajtur me bluzën e vendlindjes time, Burrel”-tregon Farruku. Ai ngjall habi kur tregon se ndoshta golin më të veçantë të karrierës së tij e ka shënuar në “Qemal Stafa”, kur nga një distancë të paktën 25 metra i ka shënuar gol ish portierit të Partizanit, Perlat Musta, i cili njihej si një nga portierët më të mirë të vendit në ato vite. Farruku thotë se “nuk mund të veçojë ndonjë portier në ato vite që kam luajtur futboll që të mos ketë ngrënë gol nga unë”.
Dali Farruku shprehet se: “futbollisti duhet të stërvitet fort, të qëndrojë larg veseve, të mbajë një regjim, ndryshe jetgjatësia e tij në fushën e blertë nuk është e gjatë”.
Nga sot Fusha Sportive e Burrelit do të mbajë emrin e Mjeshtrit të Sportit dhe “Qytetarit të Nderit të Matit” Dali Farruku, ikonës së futbollit matjanë.