Juventus rrezikon përjashtimin nga kompeticionet evropiane. Me këtë lajm hapet sot “La Gazzetta dello Sport”, sipas së cilës, bardhezinjtë mund të mos marrin pjesë në turnetë që organizon UEFA (Champions League, Europa League dhe Conference League) në sezonin e ardhshëm për sjellje antisportive.
Nëse hetimet mbi plusvalencat në Itali do të zgjaten dhe drejtësia sportive italiane nuk do të dalë në përfundimet e veta brenda fundit të korrikut, UEFA do të vendosë vetë fatin e Juventusit me një hetim paralel, përpara se të kompletohet lista e ekipeve për fazat paraeliminatore.
UEFA e ka nisur me kohë hetimin paralel dhe autonomy mbi Juventusin dhe ka marrë të gjithë dokumentet nga Prokuroria e Torinos. Organizmi drejtues i futbollit evropian kërkon të presë më parë vendimin e drejtësisë italiane, por duke parë që ajo po vonohet, do të vendosë vetë, me anë të komisionit të Fair Play-t.
Rreziku është që Juventus të përjashtohet nga Evropa të paktën një vit dhe këtë gjë nuk do ta ndryshonte dot as fitorja e mundshme në Europa League.