Derbi Tirana-Partizani i vlefshëm për javën e 33 të Superiores ndryshoi sërish nga kalendari i publikuar prej federatës vetëm pak ditë më parë.
Fillimisht ishte programuar që supersfida e kryeqytetit, e cila do të shërbejë edhe si ndeshja vendimtare për titullin të luhej më 17 maj, në të njëjtën ditë me përballjet e tjera. Gjithsesi, së fundmi sektori i garave vendosi që përballja të afrohet me një ditë.
Tirana dhe Partizani do të zbresin në fushën e Arenës Kombëtare më 16 maj, me ndeshjen që do të nisë në orën 18:30. Kjo bëhet me qëllim që e gjithë vëmendja të jetë e përqendruar te sfida ndërmjet kryesuesve dhe ndjekësve të tyre më të afërt.