Enkelejd Alibeaj ka treguar arsyet që e çuan drejt vendimit për të dhënë dorëheqjen si kreu i Partisë Demokratike.
“Një vit më parë pas dorëheqjes së Bashës një nga nënkryetarët duhet të merrte drejtimin e partisë. M’u ofrua drejtimi e nuk mund ta refuzoja. Ka pasur edhe një vendim të Kryesisë dhe grupit, sipas të cilës në një kohë të shkurtër të zhvilloheshin procedurat për zgjedhjen e kryetarin, por ishte një kohë e turbullt për PD dhe u mendua që situata të vijonte deri pas zgjedhjeve lokale. Të mërkurën doli rezultati final, atëherë përfundoi edhe mandati im. Kjo ishte një nga arsyet që u largova. Një dorëheqje nga drejtimi , është edhe një moment i kulturës politike. Ajo që ndodh në politikën shqiptare, janë zvarritje e alibira. Ishte e domosdoshme të jepja një shembull. Kam dhënë dorëheqjen edhe nga drejtimi i grupit parlamentar. Sfida e PD ishte shumë delikate. E para ishte ajo që nga zgjedhjet edhe pse lokale, doza e politizimit ishte pashmangshme, për çfarë kishte ndodhur brenda nesh. Sfida ishte që PD të dilte gjallë, që mendoj e kaluam”.
I ftuar në “Kjo Javë” në “News24”, Alibeaj u pyet nëse ka biseduar me ish-kreun e PD, Lulzim Basha për dorëheqjen. Në përgjigje të pyetjes, ai pohoi se kanë qenë vetëm miqtë e tij më të afërm, jashtë politikës, që e dinin për dorëheqjen e tij.
“Kam folur para zgjedhjeve. Unë e kuptova fare mirë që politika e vjetër është politika që duhet të refuzohet. Jemi në 2023 dhe nuk mund të vazhdojmë me shpifje dhe të pavërteta. Kjo është një arsye se përse PD e së shkuarës nuk fitoi. Nuk kam folur me Bashën për këtë çështje. Ky ishte vendimi im. Është një akt që duhet ta bëja. Unë e kam aq aftësi për të kuptuar se është koha për t’u larguar. Për largimin tim e kanë ditur vetëm disa miq, jo nga politika. Sa i përket rikthimit të Bashës, unë mendoj se partia nuk duhet të vërtitet vetëm rreth disa figurave.”