Jorida Tabaku është pyetur se si i përgjigjet kërkesës për të qenë në krye të Partisë Demokratike.
Në emisionin “Kjo Javë”, deputetja u shpreh se në fund të javës tjetër do të ketë një zyrtarizim për këtë çështje, ndërsa theksoi se PD nuk ka pse të identifikohet me liderin.
“Unë në PD i kam fituar gjërat, ndoshta kam ecur më ngadalë, por rruga është edhe më e gjatë. Po i dëgjoj të gjitha palët dhe në këtë moment ka rëndësi që të gjejmë një zgjedhje që e zgjeron PD dhe në diskutime duhet të jenë të gjithë deputetët, apo Kryesia. Javën e kaluar kemi pasur një mbledhje dhe kemi ndarë mendime se kush është më e mira tani. Zgjidhja më e mirë do të ishte të kishim një grup njerëzish pa u nxituar për të futur partinë nga një betejë në tjetrën. Besoj që në fund të javës tjetër do të kemi arritur diçka që është e konsultuar me të gjitha. PD nuk ka pse të jetë partia e njëshit, duhet të identifikohet me një fytyrë të re dhe një pamjet të re. Dhe për këtë duhet të ketë një proces normal. Në fund të javës tjetër do të ketë një zyrtarizim. Nuk ka rëndësi se kush bën çfarë, por të japim një mesazh ndryshe. Besoj se duhet të lëvizim nga qasja e individit dhe duhet një vendimmarrje më e gjerë. Dhe e vendos Kryesia e PD se kush do ta drejtojë. Nëse nxitohemi tani, e humbim mundësinë e bashkimit të demokratëve në bazë, kjo është ajo që i referohem kur them partia duhet të bashkohet në bazë.”
Tabaku diskutoi edhe në lidhje me rezultatin e zgjedhjeve të 14 majit për opozitën.
Një rezultat i tillë, sipas saj, ka ardhur si pasojë e mungesës së alternativës nga opozita dhe të debateve e betejave brenda PD në një vit e gjysmë.