Këtë të mërkurë, në qytetin e Burrelit u organizua ceremonia e betimit të kryetarit të bashkisë Mat, Agron Malaj, fitues në zgjedhjet lokale të 14 Majit, kjo për një mandat të dytë. Në fillim Këshilli në mbledhjen e parë zgjodhi si kryetar Altin Bojnin, ekonomist, ish-drejtor i Postës dhe aktualisht drejtor i Njësisë Vendore të Kujdesit Shëndetësor Mat.
Kryetari i sapozgjedhur i këshillit bashkiak, pasi lexoi formulën e betimit ftoi kryebashkiakun që u rizgjodh në këtë detyrë, Agron Malaj, të betohet dhe të mbajë fjalën e rastit.
“Sot për mua është një ditë e vecantë, pasi votohem për të dytën herë nga zgjedhësit matjanë. Ndaj u jam mirënjohës të gjithë qytetarëve që më besuan vazhdimin e punëve dhe projekteve të nisura dhe realizimin e investimeve të reja. Bashkë me Këshillin e ri të Bashkisë, me administratën, me grupet e interest, me qytetarët do të çojmë më tej zhvillimin e Matit dhe do të rrisim standardin e jetesës. Bashkë do të ecim përpara, për Matin që të gjithë e duam”,-u shpreh Malaj gjatë fjalës së tij.
Në zgjedhjet e 14 majit 2023, Agron Malaj fitoi 8736 vota, 65.92%, ndërsa rivali në garë 4517 vota, 34.08%. Malaj fitoi në këto zgjedhje 4219 vota më shumë se kandidati i koalicionit “BF”. Po ashtu në këshillin bashkiak të Matit Partia Socialiste fitoi 9 mandate nga 21, duke qenë forca kryesore në këtë këshill.
