Pas Juventusit dhe Napolit dhe dhjetra klubeve të tjera në Itali, që u akuzuan për mashtrime financiare apo dhe çmimeve stratosferike që po qarkullojnë në Arabinë Saudite për shitjen e lojtarëve, UEFA tani po mendon të ngrejë një komision të posaçëm që përcakton çmimin e futbollistëve në treg në bazë të përformancës së tyre gjatë gjithë sezonit.
Kjo është cështja që do të jetë në qendër të vemendjes në mbledhjen e Komitetit Ekzekutiv të UEFA-s, në 28 qershor. Qëllimi i gjithë kësaj është për të evituar rritjet fiktive të çmimeve të lojtarëve.
Do të jetë një grup i posaçëm pune i pavaruar që do të merret vetëm me këtë, ndërsa në fund, në bazë të statistikave të futbollistit, ky komision do të japë dhe gjykimin final. Sipas L’Equipe, veç në këtë mënyrë qeveria e futbollit mund të ndalojë sadopak transferimet me shuma marramendëse të pronarëve sheikë që po shkatërrojnë botën e futbollit. Ky komision do nisë punën që këtë merkato vere, edhe pse akoma vetë UEFA nuk e ka zyrtarizuar diçka të tillë.