Bayern Munich vijon “gjuetinë” për të gjetur pasuesin e Robert Lewandowski-t. Ofensiva gjermane është e gjitha e përqendruar në një emër, Harry Kane, për këtë nuk ka më asnjë dyshim.
Prej kohësh kanë gjetur akordin me kapitenin e “tre luanëve”, por pengesë mbetet klubi i Tottenham. Në Angli janë të bindur në këtë pikë, është thjesht çështje kohë që “gjelat” të dorëzohen, në një kohë kur Kane ia ka bërë të qartë se nuk ka ndërmend të rinovojë kontratën e tij aktuale që i përfundon në 2024.
Bayern e ka jetike gjetjen e një “bomberi”, për këtë arsye nuk dëshirojnë të presin dhe të rrezikojnë për të marrë falas Kane verën e ardhshme, por kanë paraqitur ofertën e tyre të radhës, 100 milionë paund. Jo vetëm Harry Kane, këto ditë në ishull, drejtuesit e Bayern do të përpiqen të mbyllin edhe transferimin e Kai Walker. Me largimin e Pavard, Bayern është i detyruar të lëviz për të gjetur një anësor të ri, emri i Walker është fiks në listën e dëshirave, një lojtar që pëlqehet shumë nga Thomas Tuchel.
Në këtë merkato vere, Bayern është përfshirë në një mini-revolucion teksa në Mynih kanë zbarkuar lojtarë si Kim Min-jae, Laimer dhe Raphael Guerreiro. I pyetur në lidhje me Kane dhe Walker, Thomas Tuchel nuk preferoi të komente, por mediat angleze nuk kanë dyshime që përfaqësuesit e klubit gjerman ndodhen në Londër për të mbyllur transferimin e Harry Kane.