Sot 1 euro këmbehet me 103.65 lekë, duke fituar 0.03 pikë në 24 orët e fundit.
Për rënien e monedhës euro, ish-kryeministri Sali Berisha ka gjetur shkakun dhe fajëson qeverinë. Teksa tha se vendi është në një situatë dramatike, për të ky është një tregues shumë i qartë se Shqipëria është një narkoshtet.
“Situata është dramatike, qeveria me veprimet e saj ka favorizuar këtë fenomen, me kredi që merr në euro, me mbajtjen e investimeve, pra është krijuar një raport shkatërrues për ekonominë, dëshmi më flagrante e narko shtetit. Kjo që ne shohim sot, kjo është shfaqja më e sigurt e narkoshtetit shqiptar. Gjithçka në funksion të grupeve kriminale, kjo është vetëm maja e ajsbergut. Kjo është narkoeuro”, tha Berisha.
Në konferencën për mediat, ai tha se nga kjo rënie e pësojnë familjet shqiptare dhe përfitojnë trafikantët e drogës. Në këto kushte, sipas Berishës asnjë veprim i Bankës së Shqipërisë, nuk është i vlefshëm.
“Banka nuk mund të përballet me këtë përbindësh që është narko euro, ajo e shuan bankën, të gjitha kursimet e qytetarëve në euro janë vlerësuar në mënyrë dramatike”, përfundoi Berisha.