Pas një ekspedite javore në det të thellë, studiues nga disa universitete në mbarë botën kanë zbuluar tre vullkane nënujore në brigjet jugperëndimore të Siçilisë, Itali, të cilët dyshohet të janë aktivë.
Sipas shkencëtarëve, vullkanet e sapo zbuluara janë të paktën 6 km të gjerë dhe ngrihen më shumë se 150 metra mbi shtratin e detit.
Ata bashkohen me një seri konesh të tjera vullkanike të zbuluara në vitin 2019 nga Instituti Kombëtar i Oqeanografisë dhe Gjeofizikës Eksperimentale (OGS) në zonën detare midis Mazara del Vallo në provincën siciliane të Trapanit dhe Sciacca, një qytet në Agrigento.
Dario Civile, një studiues në OGS i cili mori pjesë në projekt, tha: “Ne besojmë se ky është një zbulim shumë i rëndësishëm sepse hedh dritë mbi shtratin e detit të paeksploruar. Mesdheu është lundruar për mijëvjeçarë, megjithatë, çuditërisht, ne dimë shumë pak për shtratin e detit.”
OGS tha: “Fushata u zhvillua në bordin e anijes gjermane Meteor dhe përfundoi disa ditë më parë me skanimin e shtratit të detit të paeksploruar më parë përgjatë Kanalit të Siçilisë që u zhvillua midis 16 korrikut dhe 5 gushtit.”
Ai shtoi se studiuesit kishin mbledhur mostra shkëmbi, përfshirë depozitat e lavës, për t’u analizuar në muajt e ardhshëm.
“Ne kemi vënë re aktivitet hidrotermal në zonë, por është ende herët për të kuptuar nëse këto vullkane janë aktive. Së pari duhet të analizojmë shkëmbinjtë e tyre dhe të interpretojmë profilet sizmike me rezolucion të lartë të fituara rreth tyre.”
Gjatë ekspeditës, siç raporton Guardian, studiuesit zbuluan rrënojat e një anijeje 100 x 17 metra në një thellësi prej 110 metrash në të ashtuquajturën Bankë pa emër (Banco Senza Nome) rreth gjysmës së rrugës midis ishullit vullkanik Linosa dhe Siçilisë.
Civile tha: “Ne ende nuk dimë asgjë për këtë rrënoja, dhe për momentin është e pamundur të përcaktohet se kur daton”.
Ekspedita u krye nga Universiteti i Maltës dhe OGS. Institucione të tjera u përfshinë në kërkime, duke përfshirë Qendrën Geomar Helmholtz për Kërkimin e Oqeanit Kiel (Gjermani); MBARI, Instituti i Kërkimeve të Akuariumit të Monterey Bay (SHBA); Victoria University of Wellington (Zelanda e Re); dhe universitetet e Birmingham, Oxford dhe Edinburgh (Britani e Madhe) dhe Kiel (Gjermani).
Megjithëse shpërthimet nënujore shpesh kalojnë pa u vënë re, më shumë se 1 milion vullkane besohet të jenë nën ujë dhe ato janë burimi i 80% të aktivitetit vullkanik në mbarë botën.
Civile tha se, në të kaluarën, vullkanet nën det në atë zonë specifike kishin shpërthyer një herë me shfaqjen e ishujve të vegjël. Ndonjëherë ata dilnin nga uji dhe më pas zhdukeshin në det pak kohë më pas.
Më 18 korrik 1831, disa milje nga zbulimi i fundit, një ishull vullkanik theu sipërfaqen e Mesdheut, 30 milje larg qytetit të Sciacca.