Partizani ka falënderuar Romën me një postim në rrjetet sociale për ndeshjen miqësore që skuadra italiane zhvilloi në Titanë ndaj kryeqytetasve.
Një falënderim mbi të gjitha për trajnerin Murinjo, duke kujtuar edhe episodin e veçantë të pjesës së dytë, kur ai largoi një lojtar nga fusha duke bërë që ndeshja të luhej 10 kundër 10 pas dëmtimit të Prekës.
“Faleminderit Roma. Faleminderit mister Murinjo. Një falënderim i madh për të gjithë klubin e Romës për ndeshjen e mbrëmshme. Ishte një kënaqësi që ju mirëpritëm përsëri në Tiranë, në një tjetër natë speciale për qytetin tonë. Një falënderim special për mister Murinjon, për leksionin e tij mbi sportivitetin dhe respektin”, shkruhej në mesazhin e Partizanit, që mbante poshtë emrat e presidentit Demi, drejtorit Rama dhe trajnerit Zekiç.