Trajneri Luixhi di Biaxho jeton prej tre javësh në Tiranë pasi mori drejtimin e ekipit të Dinamos.
Ai ka dhënë një deklaratë për “La Repubblica” ku shpjegon se si e bindi projekti në Shqipëri dhe se si Siti Group beson shumë te klubi. Madje ai ka zbuluar se është ndihmuar shumë edhe nga ish-drejtori sportiv i Lacios, Igli Tare.
“Na ndihmon Igli Tare, ish-drejtori i Lacios. Këtu në Shqipëri takoj shumë italianë me pushime, ikin nga vendi ynë për shkak të çmimeve. Dallimi mes tyre dhe meje është se plazhet e bukura në jug të Vlorës i shoh vetëm në foto” u shpreh Di Biaxho.
Por Tare është shprehur se nuk është në organikën e klubit dhe se ka dhënë vetëm disa këshilla. Duket se Igli dëshiron të vazhdojë jetën e tij në Romë duke pritur për një projekt të ri që mund ta intrigojë atë.