Kombëtarja shqiptare U-21 nis të shtunën e 2 shtatorit grumbullimin në Stamboll dhe përgatitjet zyrtare për kualifikueset e Kampionatit Europian 2025 për këtë grupmoshë, duke nisur rrugëtimin për një vend në finalet e ‘EURO 2025’ në transfertën e Armenisë më 8 shtator, e më pas do të presin Rumaninë në ‘Elbasan Arena’ më 12 shtator.
Trajneri i kuqezinjve, Alban Bushi, në një konferencë zyrtare për mediat nga “Shtëpia e Futbollit”, vlerësoi cilësitë e 23 lojtarëve të thirrur. Tekniku shqiptar shtoi se në ekip ka shumë optimizëm dhe se kuqezinjtë do të japin maksimumin në këto dy takime të rëndësishme.
“Futbolli është i çuditshëm sepse ndryshon shpejt, si për mirë, ashtu edhe për keq. Ashtu edhe për afrimin e lojtarëve. Kemi pasur lojtarë që nuk kishim ndërmend t’i ftonim, por kanë bërë mirë në kampionat dhe i kemi marrë. Disa lojtarë kanë ardhur nga jashtë, si Dajko dhe Mjaki që janë pjesë e Laçit dhe që janë lojtarë shumë cilësorë dhe mendoj se do të na shërbejnë shumë për ekipin. Por edhe lojtarët e tjerë si Buxhelaj dhe Preka do të doja të kishin më shumë minuta. Nuk kanë marrë shumë minuta dhe do të shohim gjendjen e tyre.”