Dy ndeshjet e para për eliminatorët e Europianit, kombëtarja do t’i luajë në qershor, ku krahas testit të skuadrës në drejtimin e Edy Reja, risi do të jetë dhe inaugurimi i Arenës Kombëtare.
Ndeshja me Moldavinë është parashikuar të bëhet në stadiumin e ri, megjithëse në kalendarin e UEFA është e vetmja ndeshje që nuk ka ende të përcaktuar stadiumin.
Report tv ka kontaktuar në federatën shqiptare të futbollit për të mësuar stadiumin se ku do të zhvillohet ndeshja dhe përgjigjja ishte se do të pritet ende për të parë ecurinë në “Arenën Kombëtare”. Ndërkohë drejtori i stadiumit, Bardhyl Minxhozi, në një prononcim të shkurtër nuk preferoi të japë një datë të caktuar për inaugurimin e tij, por deklaroi se po punohet intensivisht dhe gjithçka do të varet nga ndërtuesi.
Punimet në impiant nuk janë ndalur në asnjë moment që kur u mor vendimi për ndërtimin e stadiumit të ri, por kur jemi 1 muaj e pak ditë larg ndeshjes me Moldavinë duket mjaft e vështirë që “Arena Kombëtare” të hapë dyert më 11 qershor.