Pas nisjes së vitit të ri akademik, edhe pse me studentët që janë në protesta dhe bojkot ndaj mësimit, Universiteti i Mjekësisë ka miratuar më në fund tarifën e shkollimit. 2.4 milionë lekë të vjetra është tarifa vjetore për çdo student që nuk pranon të firmosë kontratën për të punuar pas studimeve në Shqipëri.
Kostoja e studimit është përllogaritur nga një grup i posaçëm pune në Universitetin e Mjekësisë referuar vendimit të Këshillit të Ministrave për këtë çështje. Kjo tarifë u diskutua në Rektorat, kaloi në senatin e universitetit dhe firmën e fundit e ka dhënë Bordi i Administrimit, pasditen e së hënës.
Ata që refuzojnë kontratën do të paguajnë 2.4 milion lekë të vjetra tarifën e shkollimit. Të pyetur në lidhje me bojkotin e studentëve, drejtues të Fakultetit të Mjekësisë thonë se po zbatojnë ligjin ashtu siç duhet të veprojnë edhe studentët.