Policia e Durrësit ka vënë në pranga një 29-vjeçar, pasi ishte shpallur në kërkim për transportin e emigrantëve të paligjshëm. 29-vjeçari F.U, është pjesë e 2 grupeve kriminale që u goditën një ditë më parë, që transportonin emigrantë kundrejt parave në vendet e Bashkimit Europian. Me arrestimin e tij, ka shkuar në 10 numri i të arrestuarve në kuadër të operacionit ‘Faza’, ndërsa 4 të tjerë janë arrestuar më parë.
Hetimet kanë nisur 6 muaj më parë ku gjatë kësaj periudhe janë goditur 4 raste të veprimtarisë kriminale dhe kanë vënë në pranga 4 persona të tjerë, duke transportuar emigrantë, në rrugën Lezhë-Shkodër dhe në Shijak.
Sipas policisë, hetimet e kryera me metoda proaktive kanë dokumentuar veprimtarinë kriminale të këtyre shtetasve, të cilët të organizuar si grup kriminal, kundrejt pagesave 3500-5000 euro që dërgoheshin nëpërmjet pikave të transferimit të parave, transportonin emigrantë nga Nepali, Afganistani, Bangladeshi dhe India, që ndiqnin itinerarin “Turqi-Greqi-Shqipëri” dhe synonin të kalonin në vendet e Bashkimit Europian.
Policia tha se emigrantët, pasi grumbulloheshin në Greqi, kaloheshin nga pjesëtarët e këtij rrjeti, nga kufiri i gjelbër, në Sarandë, Gjirokastër dhe në Korçë. Më pas, ata akomodoheshin në ambiente të ndryshme dhe transportoheshin me automjete të marra me qira, drejt Shkodrës, për të kaluar ilegalisht kufirin me Malin e Zi. Gjatë aksionit janë shpallur në kërkim edhe dy persona nga Kruja dhe ka nisur procedim në gjendje të lirë për një 65 vjeçare, banuese në Durrës.