Partia Demokratike ka refuzuar të dërgojë përfaqësues në Komisionin e Reformës Zgjedhore, e cila do të mblidhet këtë të martë.
Në përgjigje të kërkesës së sekretarit të përgjithshëm të Kuvendit, Genc Gjonçaj, homologu i tij në PD, Gazment Bardhi thotë se komisioni nuk ka legjitimet dhe reforma nuk mund të bëhet nga individë “që duhet të ishin në burg për blerjen e zgjedhjeve”.
“Asnjë Komision që ka në përbërje dhe drejtim individë që duhet të ishin në burg për krime elektorale, nuk gëzon legjitimitetin për realizimin e Reformës Zgjedhore. Asnjë Komision që ka në përbërje dhe drejtim individë që nuk përfaqësojnë opozitën, nuk mund të përcaktojë rregullat për pjesëmarrje në zgjedhje të partive politike opozitare”, thotë Bardhi në përgjigjen e tij.
Duke ritheksuar nevojën për Reformë të vërtetë Zgjedhore, PD shpreh bindjen se ajo duhet të realizohet e të zbatohet vetëm nga institucione apo parti që kanë vullnet për të garantuar zgjedhje të lira dhe të ndershme.
Lexo edhe- Kuvendi i “shtrin dorën” PD-së: Sillni përfaqësues në Komisionin e reformës zgjedhore
“Personat, subjekt i hetimeve penale nr. 184/2016 apo nr. 339/1/2017 të Prokurorisë për Krimet e Rënda, janë në kushtet e konfliktit të interesit me zgjedhjet e lira dhe të ndershme, si dhe me Reformën e vërtetë Zgjedhore, për të cilën ka nevojë vendi.”- thuhet në përgjigjen e PD.
