Ndeshjet e javës së 24-t kanë dekretuar skuadrën e Elbasanit si kryesuesen e re të kampionatit të Kategorisë së Parë.
Verdheblutë kanë fituar me goleadë 5-0 në transfertën ndaj Besës që zhytet gjithnjë e më shumë në krizë të thellë, teksa kanë përfituar nga hapi iu gabuar i Bylisit. Ballshiotët u mundën në mënyrë të papritur 3-1 nga Luzi i cili lufton për mbijetesë dhe tanimë e shohin veten në vendin e dytë në renditje. Burreli mundi ekipin e Vorës në “Liri Ballabani” me rezultatin 2-1.
Ndërkohë, në grupin e skuadrave që luftojnë për play-off, fitoret e Flamurtarit dhe Korabit, u kanë mundësuar këtyre skuadrave që të arrijnë në renditje përkatësisht Vorën dhe Apoloninë, duke bërë edhe më të ndezur luftën për pozicionet e rëndësishme në pjesën e sipërme të tabelës.