Planet e bashkisë së Pustecit, kryetari Kolefski: Nga investimet në zonat për kamper tek hapja e një pike doganore me bashkinë e Prespës

Bashkia e Pustecit është bashkia më e vogël në Shqipëri, me 9 fshatra dhe ka një popullësi prej 5200 banorë. Pali Kolefski është kryebashkiaku i rradhës në ”Vendi Im” nga Edlira Prendi. Në këtë intervistë ai tregon më shumë për këtë bashki, për pasuritë natyrore dhe çfarë planesh ka për zhvillimin e bashkisë. Teksa thotë se në këtë zonë turistët janë ditorë me kamper, ai nënvizon edhe se ka studime që në këtë zonë janë edhe vendbanimet më të hershme në Ballkan. Për investimet dhe a zgjon kjo zonë interesin e investitorëve, kryetari u shpreh kështu:

”Ka interes, por të gjitha do të jenë pa prekur zonat e mbrojtura. Kërkesa ka si në pjesën e turizimit dhe për pjesën e energjisë së rinovueshme. Për këtë të dytën është e vështirë, duke qenë që është një zonë e mbrojtur. Nuk mund të mburremi shumë me kapacitet pritëse që kemi për pjesën e turistëve. Janë rreth 6 restorante që operojnë, bashkë me mini hotele dhe ka shumë guest house në fshatra dhe që operojnë në mënyrë të pavarur. Këto biznese kërkojnë mbështetjen e qeverisë dhe tonën si bashki, dhe unë mendoj që ne jemi munduar që ti ndihmojmë këta”.

Lexo edhe :

Për projektet që janë finalizuar, kryetari tregon se i pari është ujësjellësi. ”Ne kemi qenë bashki që kemi pasur problem ujin e pijshëm dhe ky problem është zgjidhur dhe ka furnizim me ujë 24 orë. Është një projekt i financuar nga qeveria shqiptare, dhe janë bërë me puse. Ne jemi në zhvillim të një projekti strategjik me qeverinë shqiptare, që përfshin bashkinë e Pogradecit dhe të Pustecit në pjesën e infrastrukturës”.

Një tjetër projekt është ai me bashkinë e Prespës për hapjen e një pike doganore. ”Ata kanë shprehur interesin për hapjen e një pike doganore. Jemi rreth 8 km afër dhe pjesa greke ka bërë edhe projektin studimor, dhe kanë nxjerrë edhe fondet për pjesën e vet. Duke qenë se janë dy zona të mbrojtura me parqe kombëtare”.

Pjesa e turistëve, është një tjetër projekt që Bashkia po punon, dhe që lidhet me zonat për kamper. ”Jemi duke hedhur idenë për krijimin e një ambienti që do të ketë mundësitë për kamper, që do të kenë energjinë elektrike, ujin e pijshëm dhe kanalizimet pa bërë ndotjen e liqenit, por edhe ambiente për të marrë shërbimet minimale të tyre”.