Trajneri i Burrelit Ditmar Bicaj thotë se matjanët do të nisin nesër përgatitjet për sezonin e ri futbollistik. Madje ai shton se në merkaton e verës do të ketë prurje cilësore, të goditura.
“Kemi rënë dakort sëbashku me zyrtarët e klubit që nesër pasdite, pak orës pa hedhjes së shortit të Kategorisë së Parë, të grumbullojmë ekipin në ambjentet e “Liri Ballabani”. Mendoj se jemi në kohë për të nisur stërvitjen me kapacitet të plotë. Sakaq gjatë kësaj periudhe ne kemi patur biseda e takime me lojtarë të shumtë. Me disa prej tyre jemi dakortësuar për veshur bluzën e Burrelit, me të tjerë jemi ende në negociata”, thotë tekniku Bicaj.
Deri tani më shumë se 70 % e skuadrës është projektuar, ndërkohë gjatë seancave stërvitore dhe ndeshjeve miqësore që do të zhvillohen në Burrel dhe transfertë do të testohen të gjithë lojtarët që kanë ambicje të luajnë me skuadrën matjane.
“Ne, shtoi Bicaj, kemi biseduar dhe jemi në proçes me lojtarë të afirmuar, që bëjnë diferencë me shumicën e lojtarëve të Kategorisë së Parë. Jam i sigurtë se do të kemi zhvillime të reja, pse jo supriza të këndëshme. Jam besimplotë se afrimet e reja do të jenë të goditura dhe tifozët do të mbeten të kënaqur”.
Tekniku i ri do të ketë ndihmës të tij lojtarin e njohur të Burrelit Sajmir Dika.