Partia Demokratike kërkon reagim nga Ministria e Arsimit për projektin fantazmë që u premtonte nxënësve, prindërve dhe mësuesve udhëtime dhe trajnime në SHBA, por që nga hetimet e policisë u zbulua se ishte gjithçka një skemë mashtrimi. Nga selia blu, drejtuesja e Departamentit të Arsimit pranë PD, Lili Sula, akuzoi ministrinë se ka braktisur nxënësit dhe mësuesit dhe sipas saj po mbron zyrtarët e korruptuar.
“Ministria e Arsimit dhe Sportit vijon të heshtë për skandalin e projektit fantazmë Let’s talk together about US 2024, ka zgjedhur heshtjen dhe mbulimin e këtij skandali! Në këtë skandal të radhës e të njohur si rasti ‘Klea Rama’, Ministria, në kundërshtim me çdo përgjegjësi dhe detyrim ndaj publikut, zgjedh të braktisë qindra nxënës, dhjetëra mësues, prindërit dhe të mbrojë zyrtarët e saj, militantë, të paaftë e të korruptuar.
Partia Demokratike në monitorim të këtij skandali, denoncon me forcë synimin e ministrisë për të ekspozuar si fajtorë mësues të veçantë, të cilët vetë i caktoi si koordinatorë dhe vetë i trysnoi dhe i detyroi të zhvillonin këtë skemë mashtrimi dhe korrupsioni. Znj. Manastirliu dhe znj. Guga! A jeni të vetëdijshme dhe kush mban përgjegjësi për zhgënjimin, traumën dhe pasojat që ky mashtrim i strukturuar ka krijuar te nxënësit dhe prindërit e përfshirë në këtë pseudo projekt?
A jeni të vetëdijshme për nivelin qesharak ku i keni katandisur institucionet qendrore dhe ato vendore të përfshira në këtë skandal? Partia Demokratike, siç e ka publikuar në programin për arsimin, zotohet për ndalimin e katastrofës që solli rilindja dhe rikthimin e arsimit në vlerat, dobinë dhe në interesin më të mirë të nxënësve, të mësuesve dhe të familjeve tona”.