Vllaznia e ka mbyllur merkaton me një transferim të orëve të fundit. Bëhet fjalë për Edlin Randi Esang-Matuti, një futbollist 21- vjeçar, i cili do të jetë pjesë e kuqebluve në këtë sezon.
Ai luan në repartin e sulmit dhe nga sa mësohet, në sezonin e kaluar është aktivizuar në Algjeri. Bëhet fjalë për një lojtar, i cili premton për të ardhmen dhe jo me kot, në mars të këtij viti ai ka bërë edhe debutimin me kombëtaren e vendit të tij, përfaqësuesen e Gabonit. Ajo ka ndodhur në ndeshjen kundër kombëtares së Senegalit.
Matuti mësohet se ka firmosur një kontratë afatgjate me Vllazninë, që duket se beson shumë te ky lojtar. Me ardhjen e tij, mund të themi se Vllaznia ka mbyllur merkaton dhe tashmë mbetet për t’u parë se cila do të jetë ecuria e saj në vijim.
Vllaznia në merkaton e verës ka afruar shtatë lojtarë. Në mbrojtje ka rikthyer ish-kapitenin Erdenis Gurishta dhe në të majtë së fundmi solli Arton Podrimcakun dhe Melos Bajramin. Ndryshime të shumta ka pasur edhe në mesin e fushës, ku janë afruar lojtarë si Ardit Deliu dhe Klinti Qato. Po ashtu, një nga afrimet që është mbështetur fuqishëm ka qenë ai i kroatit Amir Kahrimanoviç. Po ashtu shkodranët kanë afruar edhe 19-vjeçarin Ensar Tafili.
LARGIMET – Kuqeblutë kanë pasur edhe shumë largime nga përbërja e sezonit të kaluar. Largimet kanë nisur që nga portieri Mehidri dhe po ashtu janë larguar mbrojtësit me peshë si Geralb Smajli dhe Esin Hakaj, largime që ende nuk duket se janë zëvendësuar. Në mesin e fushës është larguar një emër si Lorik Boshanjaku dhe po ashtu pa shumë bujë janë larguar Ajdareviç e sulmuesi brazilian, Gomesh. Afrimet mbizotërojnë, por për nga niveli cilësor mbetet të shihet në vijim, pasi duhet thënë se në këto javë të para Vllaznia ka pasur fat me pikët, por nuk ka shkëlqyer saç pritej sa i përket lojës.