Kreu i FSHF-së, Armand Duka ka shprehur ngushëllimet për ndarjen nga jeta si pasojë e një aksidenti tragjik në Greqi të prindërve të Alban Bushit, tekniku i kombëtares së futbollit U-21. Duka i shpreh ngushëllimet Alban Bushit dhe familjes së tij për këtë humbje të madhe krahas një fotoje me fjongo të zezë.
“Sapo mësova lajmin e dhimbshëm për ndarjen tragjike dhe të parakohshme nga jeta të dy prindërve të jashtëzakonshëm, njerëzve të mirë, Ali dhe Bukurije Bushi, në një aksident në Greqi.
Në këtë moment të vështirë, mendimet e mia shkojnë tek Albani dhe të gjithë anëtarët e tjerë të familjes, që përveç trishtimit për këtë humbje të madhe, do të përballen edhe me mungesën e pamatë të dashurisë prindërore.
Në emrin tim personal dhe të Federatës Shqiptare të Futbollit, ku Albani ka kaluar shumë vite si pjesë e kësaj familjeje të madhe, shpreh ngushëllimet më të sinqerta. Qoftë kujtimi i tyre i paharruar!”, shkruan Duka.