Grupi parlamentar i Partisë Demokratike i dërgoi pak ditë më parë një letër donatorëve që monitorojnë reformat e Shqipërisë.
Në letrën e tyre thuhej të mos merrej për ekspertizë për Shqipërinë, Linda Rama, pasi sipas tyre cënon besueshmërinë e raporteve, ndodhet në konflikt interesi.
Letra i është nisur të gjitha bordeve të donatorëve që bëjnë raporte monitorimi për Shqipërinë, me autore Linda Rama. Kombet e Bashkuara në Shqipëri, në një qëndrim publik, theksojnë se UN Albania është e angazhuar për një proces rekrutimi transparent dhe të paanshëm, i organizuar sipas praktikave më të mira të përcaktuara.
Reagimi i plotë
UN Albania është e angazhuar për një proces rekrutimi transparent dhe të paanshëm, i organizuar sipas praktikave më të mira të përcaktuara nga Kombet e Bashkuara.
Procesi ynë i rekrutimit të konsulentëve ndjek praktika të drejta, transparente dhe pa diskriminim në çdo hap. Kjo përfshin praktika të hapura dhe konkurruese të punësimit, me shpallje të gjerë të pozicioneve të lira, për të tërhequr një grup sa më të larmishëm dhe të kualifikuar aplikantësh.
Të gjithë konsulentët e OKB-së përzgjidhen në bazë të kushteve të mirë-përcaktuara të punës, dhe aplikantët vlerësohen sipas kritereve objektive, ekspertizës teknike përkatëse dhe përputhshmërisë strikte me udhëzimet organizative, për të siguruar që projektet të realizohen me integritet dhe pavarësi.