Erjon Shehaj, drejtues i Prokurorisë së Lezhës do të përballet ditën e sotme me Kolegjin e Posaçëm të Apelimit, në kuadër të procesit të Vettingut. Vendimi për konfirmimin e tij në detyrë nga ana e KPK-së u ankimua nga Komisioneri Publik.
Trupi gjykues për gjykimin e kësaj çështjeje përbëhet nga gjyqtarët: Sokol Çomo, kryesues, relatore Albana Shtylla dhe anëtare Ina Rama, Mimoza Tasi, Natasha Mulaj. Shehaj e kaloi shkallën e parë të vettingut, edhe pse Komisioni i Pavarur i Kualifikimit konstatoi probleme me pasurinë dhe profesionalizimin.
Në seancën e parë dëgjimore prokurori Shehaj dha shpjegime dhe dorëzoi prova lidhur me mospërputhjet, pasaktësitë dhe mungesën e burimeve të ligjshme të huave të marra nga babai për blerjen e një apartamenti.
KPK gjeti po ashtu edhe probleme me profesionalizmin. Edhe pse raporti i Këshillit të Lartë të Prokurorisë ka qenë pozitiv për të, KPK ka evidentuar disa probleme në çështjet e hetuara nga prokurori Shehaj.
Edhe pse nuk është trajtuar nga institucionet e Vettingut, rasti që mund t’i japë fund karrierës së prokurorit, është ai i Redon Hysës. Shehaj ngriti akuzë ndaj Hysës, për vrasjen e oficerit të policisë Xhuljo Prela duke shpëtuar nga akuzat Brilant Martinajn.
Pas vrasjes së Brilant Martinajt dhe zhdukjes së kushëririt të tij Ervis Martinaj, drejtësia e rrëzoi akuzën për Hysën dhe liroi nga burgu. Por asnjëherë nuk pati një hetim ndaj prokurorit Shehaj, pasi dyshimet ishin se ai manipuloi qëllimisht dosjen për të shpëtuar nga akuzat bosët e krimit.