Princi Harry u rishfaq sot në Gjykatën Mbretërore të Drejtësisë në Londër për të apeluar kundër ndryshimeve në sigurinë e tij që nga largimi nga detyra mbretërore, me avokatin e tij duke paralajmëruar se “jeta e tij është në rrezik”.
Princi Harry, djali më i vogël i mbretit Charles, po përpiqet të anulojë një vendim të Zyrës së Brendshme në vitin 2020, i cili nuk do t’i jepte automatikisht mbrojtje personale policore gjatë qëndrimit në Mbretërinë e Bashkuar, raportoi Reuters.
Harry hoqi dorë nga detyrat mbretërore në vitin 2020 dhe tani jeton në Kaliforni me gruan e tij Meghan Markle dhe dy fëmijët e tyre.
Kërkesa e tij u refuzua vitin e kaluar, kur Gjykata e Lartë vendosi se vendimi ishte i ligjshëm, por atij iu dha leja për të apeluar.
Në ditën e fundit të seancës dy-ditore, Princi Harry foli me ekipin e tij ligjor ndërsa avokatët e qeverisë argumentuan se vendimi për të marrë një qasje “të përshtatur” për sigurinë e tij ishte i justifikuar.
Avokati i Home Office James Eady tha se vendimi ishte bazuar në një vlerësim sigurie.
Pasi një pjesë e seancës për aranzhimet specifike të sigurisë u mbajt në mënyrë private, avokati i Princit Harry, Shahed Fatima, tha se rasti kishte një rëndësi të madhe personale për princin.