Xherdan Shaqiri ka vendosur që për momentin të mos rikthehet në Zvicër. Edhe pse trajneri Murat Yakin la të hapur derën për një kthim, Shaqiri e bëri të qartë në konferencën për shtyp të Baselit: ”Për momentin, dera për Zvicrën është e mbyllur”.
Yakin kishte tentuar ta kontaktonte para shpalljes së listës për miqësoret e qershorit ndaj Meksikës dhe SHBA-ve, por nuk pati sukses, duke i lënë një mesazh zanor. “Dera është e hapur, por gjithçka varet nga ai”,-tha Yakin, duke shtuar se pret përgjigje përpara ndeshjes ndaj Kosovës në shtator.
Ai po kalon një sezon të jashtëzakonshëm me Baselin: 18 gola dhe 20 asistime, udhëheqje drejt titullit kampion dhe një finale të Kupës së Zvicrës më 1 qershor. Ai po shfaqet si lider absolut në fushë, larg angazhimeve me përfaqësuesen. Me 32 gola në 125 ndeshje, Shaqiri është një ikonë për Zvicrën, por për tani, fokusi mbetet vetëm te Baseli.