Një ngjarje e rrallë, që ngjan me skenar filmi, ka ndodhur në Bulqizë ku një 35-vjeçar, i shpallur i humbur prej tre ditësh nga familja e tij, është gjetur i gjallë në rrethana të pabesueshme, brenda automjetit të tij të aksidentuar në shtratin e lumit Zall.
Isa Nurçe ishte larguar nga banesa dhe nuk kishte dhënë më asnjë shenjë jete. Familjarët e kishin denoncuar zhdukjen e tij në polici, duke ngritur alarmin për fatin e të riut. Por kthesa e papritur ndodhi mesditën e së premtes, kur disa fëmijë që po laheshin në zonën e Zallit, pranë urës së Çeranecit në aksin Bulqizë–Peshkopi, vunë re një automjet të përmbysur pranë shtratit të lumit dhe njoftuan menjëherë banorët e zonës.
Në vendngjarje mbërritën forcat e policisë dhe shërbimi i urgjencës. Brenda mjetit u gjet i bllokuar por ende gjallë 35-vjeçari, i cili dyshohet se ka humbur kontrollin e makinës tre ditë më parë dhe ka përfunduar në shtratin e lumit. Mjeti ishte pothuajse i padukshëm nga rruga.
I riu u nxor me ndihmën e banorëve dhe u transportua menjëherë në spitalin e Traumës për ndihmë mjekësore. Gjendja e tij shëndetësore nuk është bërë ende publike, por mësohet se ai ishte në gjendje të vetëdijshme në momentin e shpëtimit.
Njoftimi zyrtar i Policisë:
“Sot, më datë 06.06.2025, rreth orës 18:30, shërbimet e Policisë kanë marrë njoftim se pranë rreth-rrotullimit të Shupenzës, është gjetur nga disa banorë të zonës një automjet i përmbysur pranë lumit.
Menjëherë shërbimet e Policisë kanë shkuar në vendngjarje dhe nga verifikimet është identifikuar drejtuesi i automjetit, shtetasi I.N., 35 vjeç, i cili një ditë më parë ishte shpallur në kërkim, pasi babai i tij kishte kallëzuar largimin nga banesa.
35-vjeçari është dërguar për ndihmë mjekësore në spitalin e Traumës.
Grupi hetimor po punon për zbardhjen e rrethanave të këtij rasti”, thuhet në njoftimin e policisë.