Botërori i Klubeve ndez motorët këtë të diele, me skuadrat më të mira në botë që sfidojnë njëra-tjetrën në Shtetet e Bashkuara të Amerikës. Pjesëmarrëse do të jenë 32 ekipe nga 6 konfederata që pritet ta kthejnë këtë turne në një festë të vërtetë futbolli.
Gjithçka nis në 15 qershor në stadiumin “Hard Rock” në Miami dhe përfundon në finalen e madhe të 13 korrikut në Nju Xhersi. Gjigantë të futbollit botëror që do të tentojnë për ta mbyllur sezonin me një trofe prestigjioz, siç është Kupa e Botës për Klube. Favoritët në letër mbeten skuadrat kryesore evropiane, ku sigurisht vendin e parë e mban fituesja e Champions League, PSG, por nuk mbetet pas dhe Manchester City apo Real Madrid, që duan të konfirmojnë se mbeten ekipet për t’u mposhtur jo vetëm në Europë, por edhe në Botë.
Vëmendje në këtë garë do të marrin dhe lojtarët e rinj që do të prezantohen për herë të parë me Kupën e Botës për Klube. FIFA i lejoi ekipet pjesëmarrëse që të transferonin lojtarë nga data 1 qershor deri më 10 qershor. Nga nënshkrimet e Real Madridit, që kanë forcuar mbrojtjen, deri te shpenzimet e çmendura të Manchester City, që tashmë ka shpenzuar pothuajse 150 milionë euro, gjithçka mbetet për t’u parë dhe shijuar.