Kishte marrë leje shpërblyese nga burgu, ku vuante dënimin me 7 vjet për trafik droge, por nuk u kthye më në burgun e Fierit.
Policia ka vënë në pranga Gentjan Taullaj, 36 vjeç nga Ballshi, i cili në momentin e arrestimit kishte një sasi kanabisi me vete, dhe një leje drejtimi mjeti greke, të falsifikuar.
Kështu, krahas dënimit për trafikun e drogës 36- vjeçari do të hetohet edhe për veprat penale “Prodhimi dhe shitja e lëndëve narkotike”, “Falsifikimi i dokumentave” dhe “Largim i të burgosurit nga vendi i qëndrimit”.
NGJARJA
Taullaj u ekstradua nga Athina pasi ishte shpallur në kërkim për trafikimin e 109 kg kanabis sativa. Më 25.11 2009 në Maminas të Durrësit në bashkëpunim me një tjetër person, Taullaj ka transportuar nje sasi prej 109 kg lende narkotike te llojit Kanabis Sativa e cila me pas do te trafikohej drejt Kosoves.
NJOFTIMI I POLICISE
Thyen lejen e dhënë nga IEVP Fier duke mos u kthyer më në vendin e kryerjes së dënimit, kapet dhe ndalohet shtetasi i shpallur në kërkim për veprën penale “Largim i të burgosurit nga vendi i qëndrimit”.
Nga shërbimet e Njësisë Operacionale “Sopoti” në Drejtorinë Vendore të Policisë Fier, në vendin e quajtur “QTU” u kap shtetasi i shpallur në kërkim:
G.T, 36 vjeç, banues në Ballsh.
Shtetasi G.T ishte person i shpallur në kërkim pasi ka thyer lejen shpërblyese dhënë nga I.E.V.P Fier ku ishte duke vuajtur dënimin prej 7 vitesh për vepën penale “Trafikim të lëndëve narkotike”.
Nga kontrolli i ushtruar i është gjetur dhe sekuestruar në cilësinë e provës materiale një sasi lënde narkotike Cannabis Sativa si dhe një dokument leje drejtimi greke e dyshuar e fallsifikuar.
Në këto kushte u bë ndalimi i tij për veprat penale “Prodhimi dhe shitja e lëndëve narkotike”, “Falsifikimi i dokumentave” dhe “Largim i të burgosurit nga vendi i qëndrimit”.
Materialet i kaluan Prokurorisë pranë Gjykatës së Shkallës së Parë Fier për veprime të mëtejshme proceduriale.
