Në renditjen e bërë nga Planet Football mbi futbollistët me më shumë driblime në 5 kampionatet kryesore të Europës, është edhe Adnan Januzaj, futbollisti me origjinë shqiptare. Kjo renditje është bërë duke u lidhur me minutat e aktivizuara, teksa minimumi për t’u bërë pjesë e klasifikimit ishte të kishe luajtur për të paktën 1000 minuta në ligat përkatëse.
Ndërkohë, Adnan Januzaj ka një mesatare prej 4.7 driblimesh në 90 minuta duke u renditur në vendin e katërt. Edhe pse sulmuesi këtë sezon ka pasur probleme fizike të cilat nuk e kanë lejuar të luajë rregullisht gjatë sezonit, serish ka treguar vlerat e tij me fanellën e Real Sociedadit.
Në këtë klasifikim, futbollisti i Kombëtares belge ka një numër të barabartë driblimesh për ndeshje me Nejmar, ndërsa ia ka dalë të lërë pas krahëve Lionel Mesin, me 4.5 driblime në 90 minuta. Ndërsa, më poshtë në klasifikim është edhe emri i Eden Hazard që ka kompletuar 4.2 driblime në 90 minuta për këtë sezon.