Një 29-vjeçare shqiptare u qëllua për vdekje nga ish-bashkëshorti i saj në Kanada. 29-vjeçarja Savannah Kulla u vra nga ish-partneri i saj 38-vjeçar Anthony Deschepper të martën në parkingun e një qendre tregtare.
Nëna e të resë shqiptare, duke folur për mediat, ka treguar momentet e fundit të së bijës.
Karen Kulla tha se vajza e saj shkoi të takonte 38-vjeçarin, pasi ky i fundit donte të kalonte kohë me vajzën e tyre 17-muajshe. Por, 38-vjeçari gjatë takimit e qëlloi me armë dhe e vrau.
“Thjesht nuk mund ta besoj që ajo ka ikur”, tha Karen. “Ajo ishte kaq e bukur, e zgjuar dhe ne e donim shumë”.
Të martën, rreth orës 14:00, Policia iu përgjigj raportimeve për një grua të qëlluar me armë në parkingun e një qendre tregtare. 29-vjeçarja u shpall e vdekur në vendin e ngjarjes.
Karen shtoi se Savannah ishte nënë e katër fëmijëve dhe kishte ndarë rrugët me Deschepper disa muaj më parë.
“Më tha rreth një muaj më parë: ‘Nëse qëndroj me të, ai do të më vrasë’,” tregoi nëna.
Sipas dëshmisë së saj, ngjarja nisi pas një debatit për një çantë me pelena. “Dëgjova që ai i tha: ‘Më duhet çanta e pelenave’, dhe ajo iu përgjigj: ‘Do ta marr unë’. Ai iu kthye: ‘E harrove çantën e mallkuar” dhe më pas e qëlloi tre herë,” vijoi Karen.
Pas ngjarjes, autoritetet u përballën me autorin, i cili u qëllua për vdekje nga policia gjatë ndjekjes. Mësohet se Deschepper kishte precedentë penalë dhe ishte në kërkim për sulme me armë zjarri në vitin 2023.
Nëna tha se Savannah kishte frikë nga ish-partneri, por besonte se ai nuk mbante më armë.